अखिल भारतीय किसान सभेच्या राज्य पदाधिकाऱ्यांची महत्वाची बैठक मंगळवार, दिनांक १२ नोव्हेंबर २०१९ रोजी बी.टी.आर.भवन, बेलापूर या ठिकाणी संपन्न झाली. त्यात पुरेशा पीक नुकसानभरपाईसाठी २५ नोव्हेंबर रोजी राज्यभर शेतकरी आंदोलन उभारण्याची हाक देण्यात आली.
अकाली पावसाने राज्यभरातील शेतकऱ्यांच्या शेतीमालाचे प्रचंड नुकसान केल्याने शेतकरी हवालदिल झाले आहेत. राज्यात सत्ता स्थापनेच्या गोंधळात मश्गुल असलेले राज्यकर्ते शेतकऱ्यांना मदत करण्यात अक्षम्य टाळाटाळ करत आहेत. केंद्र सरकारनेही अटी शर्तींचे अवडंबर माजवीत शेतकऱ्यांना मदत करण्याची टाळाटाळ चालविली आहे. राज्यपालांनी आजच कोरडवाहू शेतीला प्रति गुंठा ८० रुपये आणि बागायती शेतीला प्रति गुंठा १८० रुपये अशी संतापजनक मदत जाहीर केली आहे.
अशा पार्श्वभूमीवर राज्यभरातील शेतकऱ्यांना तातडीने पुरेशी मदत मिळावी यासाठी किसान सभेच्या वतीने दिनांक २५ नोव्हेंबर २०१९ रोजी राज्यभर आंदोलन करण्याची हाक देण्यात आली आहे. आंदोलन अधिक प्रभावी व्हावे यासाठी किसान सभेच्या सर्व जिल्हा समित्यांनी तातडीने विस्तारित बैठक घेऊन आंदोलनाची जोरदार तयारी करावी. तहसील कार्यालय किंवा जिल्हाधिकारी कार्यालयांवर शेतकऱ्यांचे धरणे आंदोलन वा मोर्चे आयोजित करण्यासाठी जोमाने तयारी करावी असे आवाहन किसान सभेने केले आहे.
डॉ.अशोक ढवळे
जे.पी.गावीत
किसन गुजर
अर्जुन आडे
डॉ.अजित नवले
